ترقي جو سفر سياسي استحڪام ۽ پاليسين جي تسلسل کانسواءِ ممڪن ناهي: احسن اقبال

اسلام آباد-13 آگسٽ (اي پي پي) رٿابندي، ترقي ۽ سڌارن واري وفاقي وزير احسن اقبال چيو آهي ته يوم آزادي ننڍي کنڊ جي مسلمانن جي عظيم قربانين کي خراج عقيدت پيش ڪرڻ جو ڏينهن آهي، ترقي جو سفر سياسي استحڪام ۽ پاليسين جي تسلسل کانسواءِ ممڪن ناهي، پاڪستان ايٽمي طاقت آهي، پاڪستاني ذهين ۽ محنتي قوم آهي، مايوسي پکيڙيندڙ ناڪام ٿيندا. اهڙو اظهار هن عالمي اسلامي يونيورسٽي جي تحقيقاتي اسلامي اداري جي اهتمام هيٺ فيصل مسجد ڪيمپس ۾ جشن آزادي جي تقريبن جي سلسلي ۾ جهنڊو ڦڙڪائڻ جي تقريب ۽ استحڪام پاڪستان سيمينار کي خطاب ڪندي ڪيو. سيمينار ۾ وزيراعظم يوٿ پروگرام جو چيئرمين راڻا مشهود احمد، يونيورسٽي جي ريڪٽر پروفيسر ڊاڪٽر ثمينه ملڪ، يونيورسٽي جي نائب صدر سميت استادن ۽ ملازمن جي وڏي انگ شرڪت ڪئي. سيمينار کي خطاب ڪندي وفاقي وزير احسن اقبال چيو ته 14 آگسٽ 1947ع تي پاڪستان جو وجود هڪ نظريي جي ڪاميابي هئي، قائد ۽ اقبال جو نظريو آزادي جي سفر ۾ مشعل راهه بڻيو، قائد جو خواب هو ته هي ملڪ هڪ ڪامياب رياست بڻجي اڀري. قيام پاڪستان کانپوءِ سوچيو پئي ويو ته ملڪ بس ڪجهه سالن تائين ئي پنهنجو وجود قائم رکي سگهي ٿو پر اڄ پاڪستان هڪ ايٽمي طاقت آهي، موجوده حالتن جي روشني ۾ هن چيو ته مايوسي پکيڙيندڙ ناڪام ٿيندا ڇاڪاڻ ته پاڪستاني ذهين ۽ محنتي قوم آهي.هن چيو ته ترقي جو سفر هڪ سائنس آهي، امن، سياسي استحڪام، پاليسين جو تسلسل ۽ سڌارن کانسواءِ ترقي ممڪن ناهي. احسن اقبال چيو ته ويزن 2010ع ۽ 2025ع جي ترقي جي سفر کي بدقسمتي سان ختم ڪيو ويو. هن ان عزم جو اظهار ڪيو ته بيروزگاري ۽ مهانگائي جو خاتمو ڪنداسين، فساد ۽ ڏڦيڙ ملڪي ترقي ۾ رڪاوٽ برابر آهن. احسن اقبال چيو ته ارشد نديم هر پاڪستاني لاءِ رول ماڊل آهي، هي محنت ۽ عزم جو عظيم مثال آهي، پاڪستاني نوجوانن هميشه پنهنجو پاڻ کي مڃرايو آهي. ان موقعي تي خطاب ڪندي راڻا مشهود احمد چيو ته زنده قومون پنهنجي غلطين مان سبق سکنديون آهن. راڻا مشهود احمد وڌيڪ چيو ته پاڪستان اقبال ۽ قائد جي خواب جي تعبير جي سفر تي گامزن ٿي چڪو آهي ۽ موجوده حڪومت پاڪستان جي بنيادي وجود جي محافظ آهي. پنهنجي صدارتي خطاب ۾ ڊاڪٽر ثمينه ملڪ چيو ته آزادي جو قدر ۽ قيمت انهن کان پڇو جنهن وٽ اها نعمت ناهي، يوم آزادي جان ۽ مال جون قربانيون ڏيندڙن کي خراج تحسين پيش ڪرڻ جو ڏينهن آهي. ان کان اڳ پروفيسر احسن اقبال ۽ راڻا مشهود احمد جهنڊو ڦڙڪائڻ جي تقريب کانپوءِ وڻڪاري مهم جي سلسلي ۾ فيصل مسجد ڪيمپس ۾ ٻوٽو لڳايو. تقريب جي آخر ۾ راڻا مشهود احمد يوم پاڪستان جي موقعي تي پاڪستان جي تاريخ ۽ ثقافت تي ٻڌل نمائش جو افتتاح ڪيو ۽ ڊاڪٽر حميد الله لائبريري جو دورو پڻ ڪيو. هوڏانهن وفاقي وزير يوم آزادي جي حوالي سان استحڪام پاڪستان ڪانفرنس ۾ شرڪت ڪندڙن کي خطاب ڪندي چيو ته آزادي جو ڏهاڙو ڪنهن به قوم لاءِ خوشي ۽ اتحاد جو ڏهاڙو هوندو آهي، اڄوڪو ڏينهن اسان جي لازوال قربانين جي ياد ڏياري ٿو، 23 مارچ 1940ع تي قائد جڏهن پاڪستان جو خواب ڏٺو ته ڪنهن کي يقين نه هو ته اهو ڪمزور ۽ وسيلن کان محروم ماڻهو هندستان ۾ هڪ نئين رياست قائم ڪندا، قوم مسلم ليگ (ن) جي پليٽ فارم تي گڏ ٿي لازوال جدوجهد ڪئي، پاڪستان جو قيام هڪ نظريي جي ڪاميابي هئي، قائد پاڪستان ان لاءِ قائم نه ڪيو هو ته هي دنيا جي غريب ملڪن جي فهرست ۾ شامل ٿئي. هن ملڪ ٿوري وقت ۾ جيڪو حاصل ڪيو ان جو مثال نٿو ملي. انهن اڳواڻن کي سلام جنهن پهرين ڏهاڪي جي اندر ئي ملڪ کي ڪامياب بڻايو. هن چيو ته اڄ هي ملڪ دنيا جي ستين ايٽمي طاقت آهي، جنهن ملڪ ۾ سائيڪل جا پرزا نه ٺهندا هئا اهو ملڪ جي ايف 17 ٺاهي فضا کي چيري رهيو آهي، جنهن ملڪ ۾ مواصلاتي نظام نه هو اڄ اهو فائبر آپٽڪ جي جديد انفرا اسٽرڪچر رکندڙ آهي، جنهن ملڪ ۾ هڪ ٻن يونيورسٽين کانسواءِ ڪا به اعليٰ درسگاهه نه هئي اڄ ان جي ڪنڊڪڙڇ ۾ تعليمي ادارا آهن. هن چيو ته 1947ع کان 2024ع تائين جي سفر ۾ ڪيتريون ئي ڪاميابيون ڏسڻ لاءِ مليون، اسان تاريخي سفر طئي ڪيو پر جيڪڏهن اسان پنهنجي ڀيٽ ٻين ملڪن سان ڪنداسين ته گهڻا پوئتي رهجي ويا آهيون، ڪوريا، ويٽنام، ملائيشيا، چين، بنگلاديش ڪجهه سال پهرين تائين اسان کان پوئتي هئا، ڇا انهن ملڪن ۾ ذهانت، صلاحيت، ديانت ۽ وسيلا اسان کان وڌيڪ آهن؟ هن چيو ته پاڪستاني ٻين ملڪن کان وڌيڪ ذهين ۽ محنتي آهن. وفاقي وزير چيو ته ترقي جو سفر هڪ سائنس آهي، جنهن ملڪ ترقي ڪئي آهي اهو چئن اصولن تي عمل ڪري ترقي جي صف ۾ شامل ٿيو آهي، امن استحڪام، پاليسين جو تسلسل ۽ سڌارن تي جنهن ملڪ ۾ سياسي استحڪام نه هوندو اتي ڪير هڪ پئسو به نه لڳائيندو. ڪنهن به ترقي يافته ملڪ ۾ پاليسيون 10 سالن کان پهرين نتيجا ڏيندڙ ناهن هونديون. اسان 1998ع ۾ ويزن 2010ع پيش ڪيو ۽ ٻن سالن کانپوءِ مارشل لا لڳي وئي، اسان 2013ع ۾ ويزن 2025ع پيش ڪيو جنهن کي 2018ع ۾ نالي ماتر تبديلي جي ور چاڙهيو ويو، هن قوم ملڪ جي چاٻي اهڙي اناڙي ڊرائيور کي ڏئي ڇڏي جنهن ڪڏهن يونين ڪائونسل نه هلائي هئي، 2018ع ۾ پاڪستان جي معيشت کي فريڪچر ڪيو ويو جنهن جو پلستر اڄ به معيشت تي چڙهيل آهي، اسان هڪ دفعو ٻيهر معيشت جو ڦيٿو هلائينداسين ۽ نوجوانن کي اهڙو پاڪستان ڏينداسين جيڪو 2047ع تائين دنيا جي پهرين 10 معيشتن ۾ شامل هوندو. پاڪستان کي صرف سياسي عدم استحڪام، لانگ مارچ، ڌرڻن ۽ ڏڦيڙن ڪمزور ڪيو. وفاقي وزير چيو ته ارشد نديم اولمپڪس ۾ گولڊ ميڊل کٽيو، اسان تعليم، صحت، سائنس، ٽيڪنالاجي ۽ روانگي واپار ۾ پاڪستان کي گولڊ ميڊل ڏيارينداسين.