لاہور ۔ 10 ستمبر (اے پی پی) لاہور ہائیکورٹ آئی جی پنجاب دے تبادلے دے خلاف اعتراضی درخواست دی سماعت 14ستمبر تئیں ملتوی کریندے ہوئیں قرار ڈتا جو آرٹیکل 212 دے تحت پوسٹنگ ٹرانسفرز دے معاملات براہ راست اعلیٰ عدالتاں اچ نئیں گھن آئے ونج سگدے ۔ عدالت آندی سماعت تے دلائل کیتے وکلا کوں بحث کرنڑ دی ہدایت کرڈتی۔ چیف جسٹس لاہور ہائیکورٹ محمد قاسم خان مسلم لیگ (ن )دے رہنما ملک احمد خان ولوں دائر شعیب دستگیر دے تبادے دے خلاف اعتراضی درخواست دی سماعت کیتی۔ ہائیکورٹ رجسٹرار آفس درخواست تے اعتراض لاتا ہئی جو درخواست گزار متاثرہ فریق کائنی ، ایجھی درخواست قابل سماعت کائنی ۔درخواست اچ چیف سیکرٹری پنجاب سودھے بئے کوں فریق بنڑایا گئے ۔ عدالتی سماعت تے وفاقی و صوبائی حکومتاں دے وکلا درخواست دے قابل سماعت ہوونڑ تے اعتراض کر ڈتا تے موقف اختیار کیتا جو آرٹیکل 212 دے تحت ایجھے معاملات اعلی عدالتاں اچ نی گھن آئے ونج سگدے ۔ وفاقی اتے صوبائی حکومت دے وکلا درخواست قابل سماعت نہ ہوونڑ دے اعتراض دی حمایت کیتی تے ڈسایا جو درخواست گزار متاثرہ فریق کائنی ، تبادلے اتے تقرر دے معاملے سروس ٹربیونل دا فورم اے۔ صوبائی حکومت دے وکیل دلائل کیتے مہلت منگ گھدی ، دوران سماعت چیف جسٹس قرار ڈتا جو عدالت دی نظر اچ سارے برابر ہن اگو کوئی پولیس افسر چیف جسٹس دے سامنڑے آکھے جو قانون تے عمل درآمد نی تھی سگدا ،کیا ایجھا پولیس افسر آپنڑی پولیس دی کمانڈ کرسگدے ۔
لاہور ہائیکورٹ آئی جی پنجاب دے تبادلے دے خلاف درخواست دی سماعت 14ستمبر تئیں ملتوی کرڈتی
مضمون کا ماخذ : آن لائن لاٹری پاکستان
متعلقہ مضامین
