اسلام آباد۔8فروری (اے پی پی):وزیر داخلہ شیخ رشید احمد اپوزیشن رہنماواں کوں چتاوݨی ݙتی اے جو قومی اداریں کوں سیاست اچ گھیلݨ دیاں کوششاں جمہوریت کیتے نقصان دہ ثابت تھی سڳدن ، اپوزیشن جماعتاں ذمہ واری دا مظاہرہ کرن ، قومی مفاد کیتے قومی اداریں کوں سیاست اچ نہ ڳھیلیا ونڄے ۔ سنوار کوں نجی ٹی وی چینل نال ڳالھ مہاڑ کریندے ہوئیں وزیر داخلہ پاکستان ڈیمو کریٹک موومنٹ (پی ڈی ایم ) دے غیر ذمہ دارانہ رویے تے اپݨے رد عمل اچ آکھیے جواپوزیشن جماعتاں دے احتساب دا ویلھا آڳئے جیں توں بچݨ کیتے اے لوک مختلف حربے استعمال کریندے پئن۔ انہاں آکھیے جو پی ڈی ایم کوں غیر ذمہ دارانہ بیان نی ݙیوݨاں چاہیدا انہاں اے بیان جمہوریت ، قومی مفاد اتے سیکیورٹی اداریں کیتے نقصان دہ ہن ایندے علاوہ ایندا فیدہ پاکستان دا دشمن چیندا پئے ۔ شیخ رشید احمد آکھیے جو ملکی اداریں بارے اپوزیشن دے اڄوکے حالیہ بیان قابل مذمت ہن اے ملک دے مفاد اچ کائنی ۔
