اسلام آباد۔5فروری (اے پی پی):صدر مملکت ڈاکٹر عارف علوی آکھیے جو بھارت ولوں غیر قانونی طورتے مقبوضہ کشمیر اچ محکوم کشمیریاں دے حق خودارادیت توں انکار انسانی وقار دی نفی اے ، سلامتی کونسل دیاں قرارداداں اتے کشمیری عوام دی خواہشات دے مطابق جموں و کشمیر جھیڑے دا حل ہی جنوبی ایشیاء اچ پائیدار امن دی کنجی اے۔ پاکستان اپݨے کشمیری بھراواں تے بھیݨیں دی مکمل حمایت اتے یکجہتی دے عزم دا اعادہ کریندے ۔ اساں کشمیریاں دے ناقابلِ تردید حق خود ارادیت گھنݨ تئیں ہر طرح دی حمایت جاری رکھیسوں۔ یکجہتی کشمیر ݙینھ 2021 تے اپݨے پیغام اچ صدر مملکت آکھیے جو پاکستانی عوام اڄ دے ݙینھ اپݨے کشمیری بھراواں کوں حق خودارادیت گھنݨ دی مسلسل جدوجہد تے بھرپور خراج تحسین پیش کریندوں۔بھارت 5 اگست 2019 ء کوں مقبوضہ کشمیر دی بین الاقو امی سطح تے منی ڳئی متنازعہ حیثیت بدالݨ تے مقبوضہ علاقے دے آبادیاتی ڈھانچے کوں بدالݨ دی غرض نال یک طرفہ اتے غیر قانونی اقدامات کیتے ۔حقِ خود ارادیت، اقوام متحدہ دے چارٹر دے نال نال انسانی حقوق دے سارے وݙے معاہدات اچ موجود بنیادی حقوق اچوں ہک اے۔
