اسلام آباد۔11فروری (اے پی پی):صدر مملکت ڈاکٹر عارف علوی آکھیے جو علاقائی تجارت دے ودھارے تے گوادر بندرگاہ توں گلگت بلتستان دی معیشت تے مثبت اثر پوسی، جی بی اچ سیاحت اتے مہمان نوازی دے شعبے دی ترقی کیتے بلاسود قرضے ݙیوݨ کیتے اقدامات جاری ہن ۔ اے ڳالھ انہاں خمیس کوں گلگت بلتستان اسمبلی دے نویں منتخب ارکان نال ملاقات کریندے آکھی اے ۔ ملاقات اچ وفاقی وزیر امور ِکشمیر و گلگت بلتستان علی امین گنڈاپور، سپیکر گلگت بلتستان اسمبلی سید امجد علی زیدی اتے ڈپٹی سپیکر گلگت بلتستان اسمبلی وی موجود ہن۔ ایں موقع تے ڳالھ کریندے ہوئیں صدر مملکت ڈاکٹر عارف علوی آکھیے جو گلگت بلتستان کوں قومی دھارے اچ رلاوݨ کیتے اقدامات کریندے پیوں ، گلگت بلتستان ودھ قدرتی حسن دا مالک اے، سیاحت دے ودھارے کیتے اقدامات دی لوڑھ اے ۔انھاں آکھیے جو گلگت بلتستان اچ اڄوکا الیکشن شفاف انداز اچ منعقد تھئے، گلگت بلتستان اچ فور جی دی سہولت تے انٹرنیٹ ݙیوݨ کیتے وختی فنڈز ݙتے ویسن ۔ انہاں آکھیے جو آن لائن تعلیم گھنݨ کیتے مشکلات دور کرݨ سانگے بنیادی انفراسٹرکچر وختی تعمیر کیتا ویسی۔ صدر مملکت آکھیے جو چین پاکستان معاشی راہداری توں گلگت بلتستان دی معیشت کوں فیدہ تھیسی ۔
